Totalmain 40 giuvnas musicantas e giuvens musicants en la vegliadetgna tranter 13 e 25 onns han puspè decis era quest onn da far musica enstagl da vacanzas. Cun auters pleds, els han investì in’emna da lur vacanzas en la musica. Per quest scopo èn els sa radunads la fin da fanadur ad Aschera en Partenz per in’emna da champ da l’Orchester d’instruments a flad da giuvenils Grischun per lavurar da cuminanza per la finamira da l’emna, numnadamain ils dus concerts da la saira a Samedan e Cuira.
Il champ da musica d’in’emna da l’Orchester d’instruments a flad da giuvenils Grischun è ì quest onn gia en la 32avla runda. Las giuvnas persunas interessadas a la musica derivan per gronda part dal Puschlav e da l’Engiadina, dentant era da las autras parts dal Grischun e per part era da la regiun da Lucerna; pia ina gruppa multifara e variada. Insaquants èn stads da la partida per l’emprima giada. Auters eran dentant participant(a)s cun experientscha. Bleras da las musicantas e dals musicants n’avevan enfin ussa anc mai fatg musica ensemen. Igl è sta l’art dal manader musical Fabio Pola da Brusio e da ses 9 manaders da register, da furmar or da la gruppa in orchester da qualitad persvadenta. Per quai han els gì a disposiziun mo quatter dis sco temp da prova effectiv.
Quai ch’è vegnì exercità è vegnì preschentà a chaschun da concerts al liber spontans ed a dus concerts da la saira planisads a Samedan ed a Cuira. Il resultat è stà impressiunant. Andy Kollegger, il president da l’Uniun chantunala da musica dal Grischun è stà fitg cuntent ed ha exprimì ses sentiments cun ils suandants pleds: “Jau ha gì larmas en ils egls perquai che la musica m’ha commuventà. Ed jau hai gì in puls fitg spert perquai che mes cor ha fatg sigls dal plaschair”. La direcziun generala dal champ ha gì Florian Schneider da Lucerna.
Ils concerts da l’Orchester d’instrument a flad da giuvenils dal Grischun han puspè lieu er l’onn proxim. Ils termins precis vegnan anc communitgads.
