Cun schlantsch vers il 2026

Portrait de Luana Menoud-Baldi

Chara lectura, char lectur

Noss engaschament per la musica instrumentala svizra è remartgabel, era perquai ch’el è fermamain orientà a l’avegnir e mantegna tuttina nossas ragischs e nossa tradiziun.

Il medem vala per la proxima Festa federala da musica 2026 (FFM26) – il pli grond inscunter da musica da l’Europa. Jau vegn a percepir e viver questa festa oravant tut sco conferma da noss engaschament per modernisar nossa scena e da la render pli enconuschenta.

Ans reusseschi da dumagnar questa sfida cumplexa? La direcziun da l’uniun suletta na po per franc betg dumagnar la sfida – era sch’ella lavura cun insistenza vidlonder dapi il 2020, ensemen cun sias cumissiuns e cun ses secretariat.

Mintga musicanta e musicant, mintga dirigenta e dirigent, mintga commember da la suprastanza e da la cumissiun da musica sto esser conscient ch’il moviment da la musica instrumentala vegn mesirà vid lur engaschament, lur activitads ed abilitads – musicalas, socialas u associativas – e vi da la moda co che nus exprimin nossa passiun. Quai è la vaira sfida.

Jau na sun mai stada in’amia da buns propiests per l’entschatta da l’onn. Els vegnan realisads mo darar. Jau guard pli gugent enavos, reflectesch e guard lura en l’avegnir plain speranza, energia e curaschi. Jau sun conscienta che la vita vegn furmada e construida da nov mintga di e che la confidenza en sasez ha ina rolla centrala en quest process.

Fixar finamiras è tuttina ina bun’idea. Ins sto dentant eleger quellas cun precauziun: Sch’ellas èn memia ambiziusas procuran ellas per gronda frustraziun. Jau preferesch perquai sfidas che appelleschan a las atgnas abilitads ed a la passiun – uschia sco ils projects da la USM dals proxims dus onns: consolidar l’enconuschientscha e l’image da nossa scena d’amaturs e promover las cumpetenzas musicalas e socialas da la scena da cultura d’amaturs svizra.

En quest senn vegn organisada la FFM26 sin basa da la nova coordinaziun tranter il comité d’organisaziun, la direcziun da l’uniun e la cumissiun da musica da la USM. Era ulteriurs secturs survegnan furmas concretas, per exempel la collavuraziun cun la SRG SSR e la plattafurma naziunala «IAF» da Jean-Marc Richard, ils novs concepts da scolaziun, la nova structura da finanzas da nossa uniun da tetg u la consolidaziun da noss secretariat.

Mintgin da nus ha ina rolla, in pensum ed ina responsabladad da manar il mund da la musica instrumentala ad ina culminaziun artistica e sociala. Nus avain dad esser conscients da quai!

La musica instrumentala duai vegnir recepida sco juvel en noss mintgadi, e la lavur da quellas persunas che la rendan viva duai vegnir undrada da maniera commensurada.

I dependa da nus, charas amias e chars amis da la musica da crair cun persvasiun a nus ed a nossa musica e da la laschar resunar vinavant.

Viva la musica instrumentala!

Beitrag teilen
Facebook
WhatsApp
Email
Telegram
Inhaltsverzeichnis

Das könnte dich auch interessieren