Stimadas dunnas,
Stimads signurs
L’onn ha cumenzà cun in drama. La tragedia da Crans-Montana ha commuventà profundamain noss pajais che ha commemorà in di da cordoli naziunal. Ultra dal schoc e dal cordoli ans regorda in tal eveniment a la fragilitad da la vita dentant era a la responsabladad collectiva che nus avain.
E quant dolurusa ch’ella saja, nagina catastrofa n’è invana. Tals schocs ans sforzan da far las dretgas dumondas ed oravant tut da metter en dumonda era nus sezs. Betg per conceder flaivlezza, mabain sco schanza. La schanza d’ans emprender d’enconuscher meglier, d’ans sviluppar vinavant e dad adattar nossas decisiuns e noss engaschament per pudair servir anc meglier ad ina societad en transfurmaziun cuntinuada.
En ina anteriura contribuziun hai jau scrit davart midadas che succedan, schebain nus las vulain u betg, e davart la muntada d’ans preparar per quellas. La situaziun actuala ans mussa da maniera brutal che quellas midadas san esser dolurusas e che nus las stuain dentant acceptar. Nus stuain sezs decider co vegnir a frida cun ellas.
Noss mund da la musica instrumentala è ina gronda famiglia intergeneraziunala. Qua s’entaupan diversas classas da la societad e differentas culturas d’origin. Qua sentan ins solidaritad, generusadad, cumpetenza e la voluntad da sa sviluppar vinavant. Ina resursa umana fitg preziusa.
A chaschun da la ceremonia a Martigny han ils pleds da la giuvna Aline Morisoli fatg in’impressiun spezialmain profunda : «Ins na po dar nagins dis a la vita, dentant pon ins dar vita als dis.» Uschia chapin nus nossa musica. Ella renda pli vivent il mintgadi.
Quest onn daventa era l’onn da la Festa da musica federala. Diesch onns suenter la davosa ediziun ha lieu quest grond ed impurtant eveniment da cultura a Bienna. Che nus possian viver là muments d’amicizia cun musica e cumpagnia che stattan en armonia cun las valurs che ans collian. Exact sco tar la realisaziun dals ulteriurs projects da la direcziun e da noss gremis: promoziun da la giuventetgna, ulteriur svilup entaifer la USM ed en collavuraziun cun auters acturs ed acturas da la scena da musica svizra.
Foto: Nathalie Gobet-Vial
