La SSR SRG e la USM han realisà da cuminanza in project per meglierar la percepziun da la musica instrumentala. Il manader da project Jean-Marc Richard ha gì l’incumbensa pretensiusa da reunir duas musicistas da renum internaziunal, ina jodladra e la Wind Band Neuchâtelois.
Il resultat remartgabel è la documentaziun musicala filmada il 2023 «E sche nus sunassan ensemen» cun las soras Berthollet – la violinista Camille e la cellista Julie –, la jodladra Barbara Klossner alias Miss Helvetia e la Wind Band Neuchâtelois (WBN) sut la direcziun da Martial Rosselet.
Foto: zVgA chaschun da l’emprim inscunter èn las trais musicistas da professiun vegnidas a savair ch’ellas na sunan e chantan betg mo cun la WBN, mabain ch’ellas fan part a la preschentaziun da “Pink Panther”. Lur sfida particulara en quest connex: Camille Berthollet a la battaria, Julie Berthollet al pult da diriger e Miss Helvetia al saxofon.
Foto: zVgLa redacziun ha fatg insaquantas dumondas a las trais artistas:
Tge ha animà Vus da prender part al project?
Miss Helvetia (MH): La sfida dad emprender a sunar in nov instrument, il saxofon.
Soras Berthollet (SB): Dad emprender entaifer curt temp ina nova disciplina. E nus sunain fitg gugent regularmain cun l’accumpagnament dad ensembles d’amaturs. Els ans intermedieschan ina perspectiva supplementara a l’ambient dad orchesters professiunals cun ils quals nus faschain musica per ordinari.
Foto: zVgCo percepis Vus la scena da musica instrumentala dad amaturs en Svizra?
MH: Fitg legra e passiunada. L’amur per la musica e l’amicizia vicendaivla sustegnan il spiert da cuminanza en vischnanca.
SB: Fitg ritga! Ella consista da blers ensembles da differentas cumposiziuns ch’èn da muntada decisiva: Ella pussibilitescha uschia a bleras musicantas e musicants da sa preschentar vinavant sin tribuna e da procurar per muments emoziunals. Quest engaschament è grondius.
Pensais Vus che quest project gidia da meglierar il maletg da la musica instrumentala en Svizra?
MH:Gea, segir. Il project nua che trais musicistas da professiun emprendan ina nova disciplina da musica da maniera ludica, duai far gust a persunas interessadas dad avair il curaschi da ristgar dad emprender in nov instrument. La preschientscha mediala – cun l’emissiun da la docu a la televisiun e la preschentaziun a chaschun dals concerts – è da gronda valur per render attractiva la chaussa.
SB: Quest project metta en scena la musica instrumentala svizra da maniera perfetga: Ils instruments a flad èn adina preschents en il mund da la musica, uschia vegnan els dentant accessibels ad in public anc pli vast.
Foto: Simon FowlerCo è Vossa relaziun cun la musica instrumentala, abstrahà dal project?
MH: Jau hai ina lunga relaziun cun la musica instrumentala. Sco uffant hai jau sunà la flauta traversa e sun stada gia cun 16 onns vice-dirigenta da la musica instrumentala Oey-Diemtigen. Jau aveva gugent las emprovas mintg’emna ed ils exercizis da musica da marschar en vischnanca. Tut quellas experientschas hai jau dastgà prender cun mai e las realisar cun diriger ils differents clubs da jodladers e las chapellas da musica populara sco era ils duos e trios da chant. Tar mias numerusas preschentaziuns profit jau anc oz da questa savida.
SB:Musicantas e musicants d’instruments da flad èn gia adin stads colliads stretgamain cun noss svilup musical, cunquai che nus avain sunà dapi nossa uffanza en orchesters e pli tard sco solistas cun accumpagnament d’orchester. E durant noss studi e nossa carriera avain nus adina sunà ensemen cun instrumentalists da flad.
«E sche nus sunassan ensemen»
La documentaziun da musica è publica e vegn preschentada mintgamai cun in concert da gala:
13 da settember 2024
- 19.30, Teater La Poste Visp
- Concert da gala cun l’Ensemble de cuivres Ambitus
19 d’october 2024
- 19.30, Stadthaussaal Winterthur
- Concert da gala cun il Zürcher Jugendblasorchester
30 da november 2024
- 19.30, Teater Naziunal Berna
- Concert da gala cun la Wind Band Neuchâtelois, las soras Berthollet e Miss Helvetia
1. da december 2024
- 10.00, Kino Capitole Lausanne
- Concert da gala cun la Wind Band Neuchâtelois, las soras Berthollet e Miss Helvetia
Foto: SBVLa reportascha extraordinaria vegn emessa la gievgia saira, ils 12 da settember 2024, primetime sin RTS1. I vala la paina da la guardar, en mintga cas!
