Il CO da l’uniun «36avla Festa da musica federala 2026 Interlaken» (FMF26) e l’Uniun svizra da musica envidan cordialmain a la participaziun a la FMF26 ad Interlaken. Per l’emprima giada ha la festa federala lieu da maniera cumpacta durant quatter dis successivs la fin d’emna d’Ascensiun dals 14 als 17 da matg 2026.
Interlaken en l’Oberland Bernais sa legra da pudair organisar la FMF26 – suenter la realisaziun dal 1996 e l’annullaziun dal 2021 pervi da la pandemia. Il CO è sa furmà da nov ed ha cumenzà las lavurs sin basa da la festa 2021.
Foto: Erich Westendarp, PixabaySin basa da differents discurs e da la situaziun ad Interlaken ha il CO decis da modifitgar in pau il concept da la festa e da sa concentrar sin ina festa per las musicantas ed ils musicants. Il concept da la «Festa da las vias curtas» è però vegnì mantegnì. Actualmain èn enconuschents ils suandants detagls da la festa:
Organisaziun da la concurrenza da musica
Danov è l’USM responsabla per la concurrenza da musica. Quai vul dir che l’USM surpiglia l’organisaziun e che il CO Interlaken è responsabel per l’infrastructura (localitads, equipament da las localitads, gidantras e gidanters euv.). Questa midada munta era che l’USM facturescha il pretsch da la carta da festa a las societads.
Las localitads previsas gia per la FMF21 vegnan da princip a star a disposiziun era il 2026. L’atun 2024 vegnan ellas dentant examinadas anc ina giada en detagl dal CO Interlaken e da la cumissiun da musica da l’USM.
Foto: Julie MassonReglament
La basa per la festa èn il reglament ed il reglament da la giuria per la Festa da musica federala. Quests documents stattan a disposiziun sin la pagina web sut Downloads & FAQ (tudestg).
Annunzia
L’annunzia po vegnir fatga a partir dad ussa online sin basa da las datas da las societads da musica registradas tar l’USM:
- Preannunzia enfin ils 30 da november 2024
- Annunzia definitiva enfin ils 30 da zercladur 2025
- Tar l’annunzia (via Hitobito tras administraturs e presidents)
Plan da preschentaziuns e carta da festa
Il pli tard il december 2024 vegn publitgada ina repartiziun en blocs sin basa da las annunzias provisoricas. Il plan da las represchentaziuns vegn publitgà fin il pli tard ils 31 d’october 2025.
Il pretsch per la carta da festa e las prestaziuns inclusas vegnan publitgads fin ils 31 da december 2024. Igl è en l’interess dal CO e da l’USM ch’il pretsch per la carta da festa resta sut 100 francs.
Per persunas che accumpognan las societads da musica vegn purschida ina carta da festa per persunas accumpagnantas. Per l’emprima giada profitan era societads da musica che na prendan betg part a la festa da cundiziuns da preferenza, per pudair giudair la fascinaziun da la festa da musica sco visitadras e visitaders.
Glista dals tocs da patg
Sco communitgà gia pliras giadas, vala la glista dals tocs da patg d’enfin ussa fin e cun la Festa federala da musica 2026. Dumondas da classificaziun da tocs da patg per la Festa federala da musica 2026 ston vegnir inoltradas fin il pli tard ils 31 da mars 2025 a la cumissiun da musica da l’USM.
Alloschi
Interlaken e l’Oberland Bernais èn destinaziuns turisticas. Perquai recumandain nus ina reservaziun tempriva dals alloschis. La regiun dad Interlaken porscha ina vasta paletta dad hotels en tut las categorias, da hostels, d’abitaziuns da vacanzas enfin a dormitoris/alloschis per gruppas. Per spargnar temp e per survegnir ina purschida adattada al preventiv pon ins utilisar la centrala da reservaziun pratica:
A partir dal favrer 2025 pon ins era reservar purschidas pauschalas praticas ed attractivas per cunviagiatur(a)s e visitadras e visitaders.
Foto: Jenny Deluca, unsplashQuaida per anc dapli divertiment ed aventuras?
I vala la paina da planisar anc in pèr uras supplementaras en la regiun da vacanzas Interlaken! Sin la bartga, en muntogna, cun il parasgol sco kick d’adrenalin u cun in’excursiun tar ina da las numerusas bellezzas da la natira ed attracziuns da la regiun pudais Vus giudair muments nunemblidaivels ensemen cun Vossas collegas e Voss collegas da musica, cun amias ed amis u cun Vossa famiglia.
Ulteriuras infurmaziuns
Bainbaud mettain nus en la rait nossa pagina web EMF26 trilingua (t/f/it). Indicaziuns per rumantsch suondan era.
- tapli infos: windband.ch (tudestg)
- trametter dumondas a: emf26@windband.ch
- pagina web FMF26: emf2026.ch
Il CO e l’USM sa legran sin tuttas e tuts che participeschan e che daventan uschia ina part da la “Festa da la musica instrumentala” ad Interlaken.
