Invezza dad allontanar tuot la documainta ramassada ils ultims decennis, s’ha Curdin S. Brunold, paschiunà musicant e dirigent dad Ardez decis da s-chaffir cun quella ün cudesch. Il resultat es üna survista detagliada da l’istorgia da las musicas instrumentalas da l’Engiadina, Samignun, la Val Müstair, la Valposchiavo e la Bregaglia (District da musica 1).
La publicaziun trilingua – rumantsch, tudais-ch e talian – as cumpuonna da documainta, fotografias, extrats da gazetta, guidas da festa, rapports d’experts e commentars da l’autur.
Foto: zvgCumanzamaint in Engiadina culla «Harmonie» Samedan
Davo chi s’ha fuormada in Grischun dal 1803 a Domat/Ems la prüma musica instrumentala, haja listess dürà amo ün pêr decennis fin cha dal 1850 es gnüda fundada la prüma musica in Engiadina: la «Harmonie» Samedan. Fin la fin dal 19avel tschientiner sun gnüdas pro 12 societats, tanter quellas eir las «Filarmonicas» Poschiavo e Brusio.
Dirigents d’eiran s-chars. Quai d’eiran pelplü magisters gnüts scolats i’l rom da musica sco seminarists o lura dirigents da professiun, chi dirigivan dasper ils orchesters da cura eir societats da musica, p, ex. Samedan e San Murezzan.
Tenor il contrat tanter la «Musika Aclas (Brail-Cinuos-chel)» e’l Capellmeister Fritz Meyer vain tal «oblio dad instruir per la düreda dels 15 november 1876 fin alla fin del mais marz 1877 et que trais dis l’eivna s’inclegia ün’ura privata al di ad ogn’ün e la saira üna prova generela per tuots. Il salari ais fixo fr 12 per eivna e da proveder per laina dad arder durante il temp. (fin avant porta).»
Prüma festa districtuala 1878 a Zernez
Quista prüma festa da musica engiadinaisa ha gnü lö als 30 mai (Ascensiun) cun üna partecipaziun da ses musicas, inclusiv la Musica da Zernez chi ha organisà la festa. Las musicas d’eiran cun 6 – 10 musicants pitschnas e quai be homens, be Samedan vaiva cun 18 musicants üna megldra occupaziun.
Las prümas festas da musica han gnü lö sainza giuria ma però adüna cun ün program structurà: Bainvgnü da las musicas e prova dals tocs generals avantmezdi; davomezdi il salüd da la musica dal lö, las producziuns dals tocs generals e da las singulas musicas. Sur da la festa dal 1912 a Scuol as poja leger: «A Scuol non füt clamada üna tala (giuria), voliand ün apunto celebrar üna festa populara sainza massa bler brimborium e climbim.» Pür dal 1921 ad Ardez es statta preschainta per la prüma jada üna giuria.
Foto: zvgFestas chantunalas da musica e concurrenza da marcha in Engiadina
La prüma festa chantunala ha gnü lö dal 1902 a Cuoira e fingià la 5avla dal 1913 a Samedan, per la prüma jada in Engiadina. Da las 11 musicas partecipantas sun stattas ses da l’Engiadina e be tschinch our d’val (lungs viadis). L’ultima festa chantunala in Engiadina ha gnü lö a Scuol dal 2007 cun 46 musicas grischunas, da quellas 17 dal District da musica 1 (Engiadina, Val Müstair e Valposchiavo).
La concurrenza da marcha es gnüda introdütta a la festa districtuala dal 1936 a Zernez; a las festas chantunalas pür ün on plü tard a Domat/Ems dal 1937. La disciplina da marchar a las prümas festas nu d’eira adüna tant buna: uschè as poja leger i’l rapport dals experts a la festa dal 1951 a Tavo: «Il salüdar dürant la concurrenza nun es admiss. Eu n’ha constatà cha divers musicants han schmiss da sunar dürant la concurrenza e salüdà a glieud a l’ur da la via e dafatta brattà pled cun tals.»
Foto: zvgCumprar cudesch
Il cudesch as poja cumprar per 20.- fancs directamaing pro’l autur:
- Curdin S. Brunold, Suot Vi 191, 7546 Adez, c.brunold@bluewin.ch
