Il musicist da l’Engiadina Simon Gabriel che ha pir 16 onns ha gudagnà l’atun passà ils SOLO-Finals dal SWISS WINDBAND AWARD. En l’intervista raquinta il giuven talent plain modestadad da sia vita cun e sper la musica e da ses plans per l’avegnir.
Cordiala gratulaziun Simon Gabriel! Tge ta vegn endament sco emprim, sche ti ta regordas al mument da la victoria?
Igl è stà mes siemi d’uffanza da pudair sunar ina giada il concert per trumbetta dad Alexander Arutiunian cun orchester. Quel concert ha ina intensitad dal tun considerabla e fitg blera musicalitad. Jau hai empruvà da betg daventar gnervus sin tribuna ed hai era vulì giudair il toc. Igl ha fatg in enorm grond plaschair da sunar quel.
Co è naschì quest siemi d’uffant?
Jau hai cumenzà a sunar quest toc avant insaquants onns cun mes magister da musica «Ludi» Anton Ludwig Wilhalm. In auter da ses scolars l’ha sunà ad in concert nua che jau hai tadlà fitg bain. A mai èsi restà quant dad aut e quant bel ch’il toc è. L’emprima part hai jau gia sunà ina giada a la Concurrenza svizra da la musica da giuvenils (CSMG). Quai è stà in success e dapi là ha quel toc adina fascinà mai.
Tge muntada ha il titel dals SOLO-Finals per tai?
Mintga concurrenza ha a l’entschatta la medema impurtanza per mai, numnadamain pervi dal rapport da la giuria. Mai interessa sco emprim co ch’ils experts e las expertas vesan mai. Pir lura vegn la concurrenza sco tala. Il titel dals SOLO-Finals è in grond success per mai, perquai che jau ma sun qualifitgà ordavant encunter radund 5000 solistas e solists.
Pertge è il rapport da la giuria uschè impurtant per tai?
Cun ina plazza sin il podest u cun ina victoria n’hai jau anc retschavì nagina critica che ma permetta da ma sviluppar vinavant. Perquai èn ils rapports u ils discurs cun expertas ed experts uschè impurtants. Per mai èsi era captivant sche la giuria è nunenconuschenta avant la concurrenza e sch’ella vegn preschentada pir suenter. Tar la SSQW avant circa dus onns era Roger Webster en la giuria – dad entupar gist el uschia fa grond plaschair ed è ina gronda onur.
Tge è stà spezial al mezfinal la fin d’avust?
En la caserna eri brutal chaud. Ultra da quai era jau gnervus, jau m’era numnadamain concentrà durant las vacanzas da scola oravant tut sin il toc dal final ed ils trais tocs per il mezfinal – The Débutanté, concert da trumbetta en Es-Dur e Don’t Doubt Him Now – avev’jau bunamain emblidà. Per fortuna eran quai tocs che jau enconuscheva gia e che jau aveva gia sunà.
Foto: Roger Stöckli, rsfilm.chRaquinta da tai e da tia famiglia.
Jau sun da S-chanf en Engiadin’Ota nua che jau hai fatg la scola primara. Gia baud hai jau empruvà da far suenter a mes frar pli vegl Gian Duri (22, geomaticher e pur en scolaziun) ed hai sviluppà ina passiun da sunar trumbetta. A partir da l’avust 2021 hai jau frequentà la scola da talents a Champfér. Mes bab ha in manaschi puril cun vatgas mamma dal Simmental e cun verdura e granezza. Mia mamma è morta da cancer il 2022. La musica m’ha gidà dad elavurar quest culp dal destin. Cura che jau fatsch musica ma sent ja damanaivel dad ella. Jau crai che quai saja in segn che la musica saja destinada per mai.
Has ti temp per in hobi?
Buna dumonda! (el ria e ponderescha) Jau lavur gugent en stalla tar mes bab. Quai ma fa plaschair e sco figl da pur ma manca questa lavur era in pau. Quai è ina midada bainvegnida tranter musica e professiun.
Cumponas ti era gugent?
Jau hai scrit in toc da test per brassband che jau stoss anc perfecziunar. Forsa vegn jau a sunar quel toc ina giada cun ina brassband u ch’el resta simplamain tar mai sco emprim project che jau poss adina sviluppar vinavant ed uschia emprender.
Foto: Maxime SchmidQuesta stad hs ti cumenzà tes emprendissadi.
Gea, jau hai cumenzà sco spezialist d’hotellaria AFQ en l’hotel Waldhaus a Segl en Engiadina. I ma plascha fitg bain ed jau ma legr che jau sai duvrar la forza da la lavur en stalla en il service per purtar tablets grevs.
Has anc temp per exercitar?
Jau hai temps da lavur irregulars e stoss organisar bain mes temp liber. Durant ils dis da lavur dastg jau exercitar il suentermezdi durant l’ura da chombra en la chaplutta che fa part al hotel. Momentan èsi impurtant per mai dad acceptar mo engaschaments musicals che ma portan vinavant en mia carriera musicala.
A la concurrenza europeica per brassbands (EBBC) 2023 a Malmö has ti bain festivà tes pli grond triumf enfin ussa.
Jau hai cuntanschì la terza plazza da la concurrenza da solists ed hai gudagnà il premi dal public ed il premi da band. Jau hai vulì ma mesirar en la scena europeica da brassband, perquai ma sun jau participà. Jau hai giudì fitg ferm Malmö ed jau crai ch’il mezfinal saja stada ina da mias meglras performanzas. Jau hai cuntanschì là ina musicalitad incredibla. Ina da las duas dunnas da la giuria m’ha tradì che ses collega masculin haja cridà durant il toc plaun. Quai m’ha commuventà fitg.
Co vas ti enturn cun gnervusadad?
Per mai èsi impurtant da pudair ir sin tribuna da maniera quieta tar tut mias preschentaziuns. Cler che jau sun gnervus, ma sche jau muss mia gnervusitad, sa transferescha quella sin il public e lura na va quai betg bain. Jau vuless ma preschentar da maniera constanta e professiunala, surrir e lura empruvar da far in regal al public cun al raquintar istorgias cun mia musica, per al commuventar. I na sa tracta betg mo da sunar tocs fitg pretensius per quai che pertutga la tecnica, mabain d’als interpretar cun blera musicalitad.
Has ti idols?
Durant lung temp è quai stà Ludi, mes magister da musica. Lura èn vegnids vitiers auters sco Roger Webster (cornetist da renum internaziunal e docent da scola auta) e Tom Hutchinson (principal Cornetist da la Cory Band). Tom era mainaregister tar la Brassband da giuvenils naziunala (NJBB) ed ha ditg a mai «I want you in my band». Jau hai ris ed el ha rrspundì: «I’m not joking, Simon» e m’ha envidà en Engalterra.
Tgi numnassas ti sco tes idol?
Maurice André (trumbettist classic e docent da scola auta) e Richard Marshall (Principal Cornetist da The Black Dyke Band ed il magister da Tom). A la EBBC era jau davantvart en il public. Tar la preschentaziun da la Black Dyke Band è Richard Marshall vegnì spert giu da la tribuna e m’ha gratulà per la concurrenza da solists. Quai è stà ina gronda onur per mai.
Foto: Arno GabrielDaventas ti in musicist da professiun?
Jau sper! L’emprim vuless jau terminar mes emprendissadi cun success ed entschaiver probablamain mes studi da musica suenter il militar. Jau studegiass gugent en Engalterra. Avant vuless jau oravant tut sunar bain per tschertgar mes limits. Jau vuless era emprender a diriger, ma per entant vuless jau sunar bain. Tuttina exercitesch jau gia ussa davant il spievel sche jau taidl musica.
Foto: zVgTge èn ils plans per 2025
La participaziun al BSEW ils 25 da schaner a Jenaz ed al SSQW ils 12 e 13 d’avrigl a Berna. Lura ma participesch jau a la concurrenza da musica internaziunala da la ARD dals 1. als 19 da settember en Germania. Per cuntanscher il final stoss jau superar pliras rundas da qualificaziun. Forsa poss ja sunar puspè ensemen cun la Cory Band da Bumaun 2025.
Simon Gabriel (* 2008)
- Instruments: trumbetta en ES, trumbetta en C, trumbetta en B, piccolo-trumbetta, cornet en B e clavazin – ha instrucziun per domadus instruments en la scola da musica Engiadin’Ota – e tiba
- Band: Brass Grischun, pli baud en la Musica Giuvenils La Plaiv Zernez
- Commember en il Trompetenensemble MOTRE e Duo M.E.Tr.E., cun ils quals el ha gudagnà differents premis
- Suna oravant tut sco solist u en champs da musica (p.ex. NJBB)
- Ha fatg cun success il 2020 l’examen d’admissiun da la NJBB sco il pli giuven candidat
- October 2023: Invit da la Cory Band per dus concerts en Engalterra
Foto: Vivivan@Rheinheimer.orgSes palmarès impressiunant sco solist
Concurrenza grischuna da solo e dad ensemble (BSEW)
- 2016: 4. plazza
- 2017, 2018, 2019, 2022 e 2024: 1. premi e titel da champiun
Concurrenza svizra da musica da giuvenils (SJMW)
- 2017, 2019 e 2021: 1. premi cun distincziun
- 2022: 1. premi cun distincziun a la ‘Entrada’ ed en il final
- 2023: 1. premi cun distincziun a la ‘Entrada’ e 1. premi en il final
Concurrenza da talents dal conservatori dal Vorarlberg
- 2019 e 2020: 1. premi
Concurrenza svizra da solo e quartet per instruments a flad da sturs ed instruments da percussiun (SSQW)
- 2019: cuntanschì il final sco paricipant il pli giuven (10 onns)
- 2021: 1. premi categoria U13
- 2023 e 2024: 1. premi categoria U16
Concurrenza da musica Aschera/Schiers
- 2022: 1. premi cun distincziun
Concurrenza da solists European Brass Band Championship (EBBC)
- 2023: 3. premi en il final e premi dal public e da band
SOLO-Finals SWISS WINDBAND AWARD
- 2024: 1. premi en il final
