En il rom dal “Onn da la litteratura svizra” surdat il team da project da la cumissiun da musica da l’USM ina carte blanche a persunalitads da la scena da musica instrumentala svizra, per ch’ellas possian ans preschentar lur cumposiziuns svizras preferidas. Roman Caprez è fascinà da l’ovra dad Olivier Waespi “At the Crossroad” che ha gì sia primaudiziun ils 12 da mars 2015 en la citad d’universitad da Jena.
Roman Caprez è creschì si a Trin GR. Ses studi ha el terminà il 2004 al Scola auta da musica a Turitg tar Stanley Clark cun il diplom da sunar concerts en orchesters. El è stà solist da posauna en la Brass Band Sursilvana, en la Brass Band Bürgermusik Lucerna e tar l’orchester sinfonic da giuvenils svizzer. Dal 2005 al 2009 ha el gì la direcziun da la Brass Band Sursilvana cun la quala el ha pudì festivar differents success.
Dapi il 2017 lavura Roman Caprez sco manader da la partiziun dal rom per percussiun e musicist d’instruments da flad a la scola da musica da Rontal. El suna tranter auter sco suppleant en l’orchester sinfonic da Berna, 21st Century Orchestra, Argovia Philharmonic ed en il Collegium Musicum Lucerna. Sco dirigent maina el la Brassband da Root, la societad da musica Risch-Rotkreuz, la Young Wind band Rontal e dapi quest onn la Band B da la Brass Band da giuvenils da Lucerna.
Roman Caprez, pertge «At the Crossroads»?
Ils 18 da zercladur 2017 avain nus preschentà a Cuira cun la Brass Band Sursilvana e cun la filarmonia da chombra dal Grischun sut la direcziun da Phillipe Bach per l’emprima giada quest’ovra en Svizra.
Tge As fascinescha ord vista musicala?
La simbiosa da brass-band ed orchester sinfonic m’ha fascinà a partir da l’emprim mument. Il corp da resonanza gigantic, sin tribuna eran radund 120 musicistas e musicists, aveva fitg bleras fassettas ed ha savì porscher tut, dal tun il pli fin dals artgists fin tar il tutti imposant. La cumposiziun è instrumentada da maniera excellenta, sco usità tar Oliver Waespi, ed ha gì in grond effect tar il public sco era tar ils commembers da l’orchester.
Avais Vus cumponists preferids?
Na, en sasez na. La qualitad e la multifaradad da las cumposiziuns svizras è fitg legraivla ed enconuschenta sur noss cunfins. Quai pon ins vesair adina puspè a chaschun da concurrenzas internaziunalas. Quest onn hai jau realisà in concert exclusivamain cun litteratura svizra e n’hai gì insumma naginas difficultads tar la concepziun dal program. Quest fatg muss la gronda dimensiun da la purschida da buna litteratura svizra.
At the Crossroads
Cumponist: Oliver Waespi (annada 1971)
Onn da publicaziun: 2015
Chasa editura: Atgna chasa editura Oliver Waespi – Glista d’ovras
