Chara lectura, char lectur
Tge temp curius: Ina guerra en vischinanza preoccupanta, tut vegn pli char, ed avant curt temp ans smanatschava ina mancanza d’energia. Il mund para dad ir sutsura. Per fortuna datti la musica instrumentala, ella ha ina resposta per mintga sfida.
Chavazzin guerra: Era en nossas retschas datti mintgatant dispitas, ma perquai n’entschaivan ins betg gist a sa pitgar. Il cuntrari. Co hai bain num da maniera gista: nua ch’ins chanta e suna, là duais ti star, ils nauschs n’han naginas chanzuns.
Pertutgant ils daners ed il svilup dals pretschs: en il sectur d’amaturs èn ils daners da muntada secundara. Qua domineschan l’activitad voluntaria ed ils uffizis d’onur. Cun excepziun da dirigent(a)s n’è per regla nagin emploià. E nua ch’i na sa tracta betg da daners è il potenzial da conflicts pitschen, sco ch’ins sa. Cler, las premias da las cassas da malsauns u las chaussas dal basegn quotidian èn charas, musica instrumentala dentant è nunpajabla.
Ma tge ha musica instrumentala mo da far cun energia? Fitg bler! Tgi che è stà ina giada ad ina prova da musica suenter in di nausch e stentus, sa tge che jau manegel. Ina prova è sco ina ovra electrica, ella chargia puspè las battarias persunalas e dat blera energia. La musica ans maina ad auters patratgs positivs e lava ils quitads or da l’olma.
Musica instrumentala ha pia respostas per bleras da las sfidas actualas. Perquai n’è la musica instrumentala betg mo occupaziun dal temp liber, il cuntrari da lungurella u in hobi per persunas senza ideas. Ella n’è betg la decoraziun sin la turta ch’ins savess era laschar davent, mabain il levon en la societad che chaschuna pir che la pasta leva. Insatge che ans mantegna en vita, per usche dir ina «vivonda». E quai betg mo per nus, mabain era per nossa societad.
Esser collià cun quest sectur da la cultra e dastgar m’engaschar per quel, quai è insatge dal pli bel per mai. Sco commember da la direcziun da la USM hai jau dastgà far quai schizunt sin il pli aut nivel da l’uniun. Suenter 7 onns en la direcziun da l’uniun, dals quals 3 onns sco vicepresident, vegn jau ussa a far plazza a novas forzas a chaschun da la RD dal 2024.
Cun mes engaschament sun jau stà in da blers ch’èn s’engaschads per nossa chaussa, saja quai sco president, dirigenta, musicanta u jau sco funcziunari da l’uniun. Quest engaschament vegn prestà da maniera voluntaria ed en furma d’uffizis d’onur e quai è tut auter che evident. E quai na dastga era mai daventar evident. Quest editorial a la fin da mes temp en la direcziun da l’uniun duai exprimer la stima sincera e la gronda renconuschientscha per la lavur prestada da tuttas e tuts ch’èn s’engaschads per la musica instrumentala. Al medem mument vuless jau engraziar per la buna collavuraziun caracterisada da confidenza. Jau sun segir che la musica instrumentala po guardar vers in avegnir positiv, gia perquai ch’ella ha las respostas a las sfidas da noss temp, sco menziunà a l’entschatta.
