Chara lectura, char lectur
«Il sulet cunfin per nossa futura prosperitad èn noss dubis dad oz.» Quest citat da Franklin D. Roosevelt m’accumpogna dapi il 2020. En in’intervista per «unisono» hai jau gia remartgà che jau sun cumplettamain conscienta che mo la midada è constanta e che l’adattaziun e l’evoluziun èn necessitads vitalas. Quai na vul betg dir ch’ins stoppia midar tut cuntinuadamain, mabain ch’igl è impurtant da persequitar ina visiun – ina strategia – che correspunda a las realitads, a las schanzas ed a las ristgas che nus inscuntrain sin nossa via.
Avant tschintg onns avain nus perquai elavurà ina perspectiva per rinforzar la posiziun da la USM en la scena culturala svizra, per augmentar ses grad d’enconuschientscha e per la sviluppar sco center da cumpetenza per la musica instrumentala.
La strategia cumpiglia otg accents tematics: cultura da la USM, structura, purschidas e prestaziuns, finanzas, communicaziun interna, augment dal grad d’enconuschientscha, promoziun da la generaziun giuvna e networking/lobbying.
Questa perioda va ussa vers la fin. E malgrà che 2020 e 2021 n’èn strusch stads nizzaivlas per realisar nossa strategia – pervi da la pandemia – avain nus laschà evaluar la realisaziun da la strategia – oravant tut durant ils davos trais onns – da la direcziun da l’USM, da sias cumissiuns, dal secretariat permanent e da nossas uniuns chantunalas.
Nus ans avain vulì persvader, sche nossa lingia saja la dretga, avant che definir ina nova strategia per la perioda 2025-2030. Perquai avain nus fatg ina retschertga tar nossas uniuns chantunalas che ha purtà in resun tant interessant sco positiv. Ils resultats vegnan preschentads detagliadamain a chaschun da conferenza dals presidents il mars. La strategia 20–25 ha pia gì la dretga direcziun ed è sa muventada vers noss ideal. Naturalmain n’avain nus betg pudì terminar tut las axas strategicas, nus vegnin dentant a cuntinuar quai che nus avain cuntanschì enfin ussa.
La nova strategia vegn perquai a cuntinuar la via da la strategia precedenta e persequitar adina la medema finamira: da concretisar nossa visiun, da sviluppar l’USM ad in center da cumpetenza renconuschì per la musica instrumentala en la scena culturala svizra e da dar al mund da la musica instrumentala l’attracziun e la renconuschientscha necessaria.
E nus tuttas e tuts avain da giugar ina rolla. Lain pia avair confidenza da la qualitad e da l’energia da noss moviment. Lain cuntinuar d’al mantegnair en vita, d’al animar e d’al dar la forza ch’el merita. Cun superbia speziala da la capacitad da svilup nossa scena da musica As engraziel jau per Vossa passiun e Voss engaschi e che Vus As mettais a disposiziun sin tut ils nivels per quest’art che nus appreziain uschè ferm, la musica instrumentala.
