L’Uniun chantunala da musica dal Grischun (UCMG) è ì vias cumplettamain novas en il rom da ses project da transfurmaziun “Glanz & Trompete” per entusiasmar umans giuvens per la musica instrumentala. Dus da quels projects èn “UCMG on tour” e la All-Star-Band «Caprihorns». Ina retrospectiva sin il project da success cun Chiara Jacomet, musicista e chantadura dals Caprihorns e cun Andy Kollegger, il president da l’UCMG.
Andy Kolleger, co èsi vegnì tar quest project da promoziun?
Nus avain realisà dus pitschens projects gia en l’emprima runda da las intenziuns da promoziun cun il num «Projects da transfurmaziun» purschidas da la Confederaziun e dal chantun per il sectur d’amaturs (coaching da societads ed apparats da mesirar CO2). Suenter la prolungaziun dad in onn per inoltrar dumondas, èsi stà cler per nus da lantschar anc ina dumonda. E nus avain pudì profitar da la lavur preliminara da l’emprima runda.
L’UCMG ha lantschà dus projects parzials.
Exact, primo «UCMG on tour» e secundo la All-Star-Band «Caprihorns» cun la giuvna chantadura Chiara Jacomet. Tar tuts dus projects parzials han las medias socialas gì ina rolla impurtanta en vista a la definiziun da la gruppa en mira <20. D’ina vart perquai che nus avain appellà sin medias socialas a la participaziun, da l’autra vart era per rapportar sin quels chanals davart nossas activitads.
Lain discurrer l’emprim da «UCMG on tour». Co è questa tura stada?
Cun «UCMG on tour» essan nus stads preschents a tut las occurrenzas grondas en il chantun. Cun in stan concepì aposta per questa tura, in ensemble da musicant(a)s, material d’infurmaziun ed instruments per experimentar. Per exempel a la festa da Cuira cun ina preschientscha da record da 90’000 persunas. Tar noss stan avain nus rendì attent a la musica instrumentala cun producziuns musicalas. Persunas interessadas han empruvà ils instruments cun l’instrucziun da spezialist(a)s e nus avain distribuì material da publicitad, per exempel per ils champs da musica per giuvenils.
Tge resuns avais survegnì?
Il resun d’in commember dal CO da la festa da Cuira po servir sco exempel per tut ils blers resuns che nus avain survegnì: El ha numnà quai in’idea propi grondiusa che la musica instrumentala saja stada preschenta da maniera infurmativa cun in stan ed haja uschia enritgì la festa d’ina maniera speziala. Nossa preschientscha è vegnida percepida – e quai betg mo da «l’atgna glieud», mabain era da la publicitad, quai ch’è era stada ina da nossas finamiras principalas.
Tge ha «UCMG on tour» purtà per la musica instrumentala dal Grischun?
La finamira da «UCMG on tour» è stada da purtar la musica instrumentala tar la glieud da maniera innovativa ed infurmativa. Igl è grategià dad augmentar la visibilitad da la musica instrumentala. Ed igl è stà definitivamain pli simpel d’entrar en contact cun glieud che n’ha da far nagut cun la musica instrumentala. Il public ans ha percepì era là nua ch’i n’ha dà nagin contact direct. Cun la pussaivladad dad experimentar cun instruments al lieu avain nus era vulì svegliar l’interess per instruments a flad.
Co è stà il project parzial «Caprihorns»?
Cun in casting avain nus tschertgà las persunas per la nova All-Star-Band, ils Caprihorns. La band ha exercità da maniera professiunala in toc cumponì dal star da musica svizzer Nickless. E la giuvna chantadura Chiara Jacomet da la part rumantscha dal Grischun, ha contribuì il text ed il chant dal song.
Co è stà il casting per la band?
Il casting ha gì lieu mo en las medias socialas. Persunas interessadas èn vegnidas animadas da chargiar in video nua ch’els sunan in curt toc musica. Ditg avertamain n’avain nus betg survegnì lavinas da videos. Quai ha probablamain da far cun il fatg ch’i dovra curaschi da s’exponer cun l’instrument sco solist en l’internet. Per fortuna avain nus survegnì avunda e bunas candidaturas ed avain pudì furmar la band cun otg differents instruments a flad.
Co è sta il resun da las medias?
Nus essan londervi da far il spievel da las medias, nus savain dentant dir gia ussa ch’igl è era stà in success medial. Da las gasettas localas sur la televisiun locala enfin tar il Radio svizzer è vegnì rapporta da maniera vasta e per part pliras giadas davart il project.
Chiara Jacomet, co è il project stà per tai?
Per mai èsi ina gronda onur. Jau hai gì in grond plaschair da la dumonda ed hai ditg gea senza ponderar ditg. Jau sun stada conscienta che jau na vegn betg a survegnir uschè sper puspè ina tala occasiun. Grondius hai jau chattà ch’il chantun Grischun s’engascha uschè ferm per la cultura e per in project da motivar umans giuvens dad emprender in instrument a flad. Quai hai jau vulì sustegnair, e per mai èsi stà ina grondiusa pussaivladad da chantar.
Il text per il song has ti scrit en tia lingua materna per la musica or da la plima da Nickless
A mai plascha sia musica e per mai èsi stà cool ch’jau hai dastgà scriver il text per rumantsch. Scriver il text per la musica d’insatgi auter è stada ina nova incumbensa ed al medem temp ina fitg bella sfida per mai. Quai faschess jau gugent puspè ina giada en l’avegnir.
Avevas ti gia avant ina giada contacts cun la scena da la musica instrumentala?
Gea, pli baud, sco matta pitschna. Jau sun creschida si en la vischnanca da Rabius en Surselva e l’uniun da musica Surrein-Rabius ha sunà per exempel a chaschun dad occurrenzas da la baselgia.
Tge t’ha fatg la pli gronda impressiun tar il project cun ils Caprihorns?
Ch’igl è stà pussaivel da realisar in project uschè grond en in temp uschè curt (avrigl fin october) da maniera talmain professiunala.
Pon ins sortir cun quest project da la «bubble» da la musica instrumentala?
Igl è stà ina fitg bella via dad appellar a la generaziun giuvna sin differentas plattafurmas da medias socialas e da preschentar il maletg da la musica instrumentala da maniera coola e moderna. Tenor mai stuessan ins ussa realisar anc dapli. Per exempel tar il repertori – las societads en las vischnancas pudessan sunar tocs pli variads e pli actuals, forsa era sa preschentar ina giada sco Big Band u insatge sumegliant, ir dapli cun il temp e mantegnair tuttina aspects tradiziunals.
Andy Kollegger, il casting per la band n’ha betg gì il resun giavischà, autras acziuns dentant bain.
Las contribuziuns sin medias socialas han funcziunà fitg bain. Il dumber da clics è stà aut. E tar las impressiuns generadas sin tut ils chanals essan nus tar plirs milliuns. Il song «Ensemen» dals Caprihorns cun la chantadura Chiara Jacomet pon ins valitar sco bel success. I ha bain dà insaquantas difficultads fin tar la publicaziun, ellas han dentant pudì vegnir dumagnadas cun bravura dals commembers dal project.
Il song «Ensemen» è cumparì ils 6 d’october. Co ha cumenzà il streaming?
Nus essan surprais da maniera positiva! Gia l’emprim di è il song vegnì cliccà passa 1000 giadas sin YouTube, ed era suenter è el vegnì tadlà diligentamain. Era staziuns da radio han empermess da prender il song en lur playlist. «Ensemen» è era disponibel sin plattafurmas da streaming usitadas sco Spotify.
Tadlar «Ensemen»
Dad «Ensemen datti era notas per societads da musica.
Nus essan londervi dad preparar las notas per furmaziuns da brass e d’armonia. Ulteriuras infurmaziuns davart il download vegnan publitgadas sin nossa pagina web.
Tge finamiras da project ha l’UCMC?
Mussar da maniera proactiva la musica instrumentala al public en mira (< 20 onns) sco coola, moderna, frestga, averta e cun in bun nivel cultivà.
È questa finamira vegnida cuntanschida?
L’evaluaziun da la finamira è anc en elavuraziun, las quotas da clics sin las medias socialas, pia là nua che la generaziun giuvna è activa, permettan dentant gia ussa in facit zunt positiv. Questa glieud giuvna n’avessan nus mai cuntanschì cun ils chanals classics e cun meds da publicitad tradiziunals, u segir betg en quest dumber. E grazia al project parzial «UCMG in tour» essan nus era stads preschents en la vasta publicitad.
L’UCMG è pia cuntenta?
Nus essan zunt cuntents cun quai che nus avain cuntanschì ed engraziain a la Confederaziun ed al chantun, a noss sponsurs ma era a noss(as) delegad(a)s ch’els/ellas ans han pussibilità quest project. In grond engraziament va era a la manadra dal project Bianca Mayer, che ha purtà il project ad in success cun grond engaschament, cun passiun, consequenza e cumpetenza.
Tge èn stadas las pli grondas sfidas?
Cun quai che nus avain survegnì il vair «go» pir a chaschun da nossa radunanza da delegad(a)s da l’avrigl, ed il project ha stuì esser terminà fin ils 31 d’october, è il squitsch da temp stà la pli gronda sfida. Normalmain dovran ins quel temp mo per la planisaziun d’in project. Nus avain dentant stuì planisar, organisar, realisar, documentar e terminar tut entaifer quel temp.
Ultra da quai avais Vus fatg tut per l’emprima giada.
Gea, quai è era stà il motiv che vias prendidas èn sa mussadas adina puspè sco vias tschorvas e ch’ins ha stuì tschertgar novas. Igl è stà sco sche nus avessan gì da currer in maraton en temp da record che vegn organisà en in labirint.
Igl è cler ch’i sto esser avant maun ina confidenza enorm gronda cun questas circumstanzas, saja quai da las delegadas e dals delegads vers l’uniun chantunala ma era da la suprastanza vers la direcziun dal project e las persunas involvadas en il project. Nus avain era gì fitg blera fortuna, da quai essan nus conscients.
Co valiteschas ti la persistenza dal project?
Tge che resta segir è in song cool che vegn forsa sunà era dad ina u l’autra societad. I resta era il maletg cun il qual nus avain dastgà intermediar che musica instrumentala saja innovativa, dinamica ed averat per chaussas novas e ch’ella sappia perquai senz’auter era motivar ed entusiasmar glieud giuvna. Ultra da quai resta ina enorma experientscha. Il pli bel fiss natiralmain, sch’i fiss grategià da gidar a la scola da musica e/u ad ina u l’autra societad da survegnir novs commembers.
Co vai vinavant? Datti projects successivs?
Nus examinain ulteriuras producziuns cun il Caprihorns e ponderain, sche nus cuntinuain cun «UCMG on tour». Enfin ussa n’han ins dentant anc tratg naginas decisiuns concretas.
Foto: GKMV
