Charas musicantas, chars musicants
La festa federala da musica (FFM) è gia passada e las 550 societads da musica cun ses passa 20’000 musicantas e musicants ed er las fullas da glieud interessada pon guardar enavos sin in spectacul attractiv cun bleras novas experientschas, blers inscunters amicabels e blers muments da buna cumpagnia e curturella.
Societads da musica en uniforma che fan parada, saja quai en furmaziun tradiziunala u cun evoluziuns, attiran adina bler public. Er a la FFM a Bienna n’è quai betg stà auter. La SRG SSR ha perquai gia baud decidì da realisar a Bienna per l’emprima giada in livestream da la concurrenza da marschar. Quests videos èn natiralmain er interessants per las societads da musica, per vesair sez co ch’ellas èn marschadas u co che las figuras da las evoluziuns, las coreografias, èn grategiadas. L’equipa da RTR ha realisà quest livestream cun grond success ed ils videos pon ins guardar sin PlayRTR.
Sper quai ha la SRG SSR er rapportà en divers formats da la FFM, emissiuns da radio sco per exempel «Kiosque à musique» u «Artg musical», emissiuns da televisiun sco «Bella musica» (Potzmusig) u in film da cuntrasts (RTR, Fascinaziun musica da marschar). Uschia ha la chasa da medias naziunala purtà viador en il mund in grondius e bel purtret da la scena da musica instrumentala svizra. Ina scena che viva e che mussa che la lavur d’emprova, l’engaschi per programs da musica attractivs sa paja. Blers fans da musica han visità Bienna e gì plaschair da tantas bellas producziuns.
La FFM è be in’occurrenza che mussa la vitalitad da la musica instrumentala en Svizra. I dat er las festas chantunalas, regiunalas u districtualas che porschan adina puspè occasiun per inscunters musicals. Per las societads mintgamai ina pussaivladad per sa preschentar betg mo avant ina giuria mabain er avant il pievel.
Gist quest plaschair da l’auditori, las fatschas legraivlas e l’applaus èn la paja per musicantas e musicants. Els dattan la motivaziun per cuntinuar, exercitar vinavant per porscher er en l’avegnir concerts attractivs, organisar festas da musica ed uschia dar in ferm sustegn per nossa cultura. Ed er las redacziuns da musica pon uschia sa legrar sin ulteriuras emissiuns da musica instrumentala. Perquai mes appel: Musica – enavant – marsch!
Foto: zVg
