Chara lectura, char lectur
Sco partenaria persvadida ed engaschada da la branscha, promova la SSR la creaziun musicala cun emetter titels da musica svizra da tut ils stils musicals – da la musica contemporana, hip-hop u musica populara. Artist(a)s svizzers promova ella gist da maniera dubla: directamain cun acquistar ils dretg d’emissiun (via SUISA e SWISSPERFOM) en la valur da plirs diesch milliuns francs, ed indirectamain tras sia lavur da medias.
En quest senn vegn la SSR cun sias unitads d’interpresa (RTS, RSI, RTR ed SRF) a dar era il 2024 ina plazza fixa a la musica populara. Suenter il 2023 ch’è sta caracterisà fermamain da la folclora e da la Festa da musica federala a Bellinzona, vegn la musica instrumentala ussa accentuada pli fitg en collavuraziun cun la USM. Quest partenadi ans fa spezialmain plaschair, perquai ch’el pussibilitescha novas registraziuns da titels che vegnan sunads da societads da musica da tut las regiuns da la Svizra. L’emissiun da quellas registraziuns tegna plinavant quint da las aspectativas dal public e da las medias: La «SRF Musikwelle» emetta mintga di circa 10 registraziuns da furmaziuns instrumentalas svizras – pia passa 3650 – ultra da l’emissiun da mintg’emna. Il partenadi tranter la SSR e la USM vegn a cuntanscher sia culminaziun ils 30 da november 2024 a chaschun dal festival da la musica instrumentala a Berna che vegn accumpagnà da pliras emissiuns da TV e da radio. Ma l’engaschament da la SSR SSR va vinavant: Era autras occurrenzas renumadas sco la festa federala da musica d’accordeon a Sursee (1./2 da zercladur), diversas festas da musica chantunalas e la concurrenza da chors svizra survegnan ina plattafurma.
Era sche questa curta invista na tegna betg quint dal program da musica populara da la SSR, mussa ella tuttina la colliaziun stretga cun la lavur artistica en Svizra. Quai cumprova la renovaziun da la “Charta da la musica svizra” da quest onn, ina colliaziun cun pliras uniuns da la branscha che exista dapi 20 onns e che ha chaschunà pass per pass l’augment da l’emissiun da titels svizzers sin tut ils chanals da radio da la SSR.
Questas mesiras fitg impurtantas per la musica svizra vegnan actualmain messas en dumonda.
La finanziaziun dal service public vegn puspè cumbattida cun l’iniziativa “200 francs bastan”. Sia approvaziun chaschunass la smesada dals meds per la SSR. Ils effects per il program da la SSR fissan catastrofals, ed uschia era per la purschida da musica.
La cunterproposta dal Cussegl federal, la diminuziun da la taxa sin 300 francs chaschuna era in grond squitsch sin il preventiv da la SSR, ensemn cun la perdita da la cumpensaziun da l’inflaziun e la diminuziun drastica da las entradas da la reclama.
La scena da musica svizra e la SSR ston perquai s’engaschar da cuminanza per ina realisaziun d’in program attractiv, dentant era per il mantegniment optimal dals meds finanzials.
