Il 1. da settember 2023 entra en vigur la Lescha svizra davart la protecziun da datas (LPDrev) revedida. Il pli tard ussa ston las uniuns e las societads s’occupar dal tema. Nus avain mess ensemen qua las infurmaziuns las pli impurtantas sco era renviaments a musters nizzaivels ed era ina collecziun da FAQ.
Situaziun da partenza
La Lescha svizra davart la protecziun da datas (LPDrev) revedida oblighescha da prender mesiras necessarias per garantir la segirezza da las datas persunalas e per impedir tant sco pussaivel l’abus da datas. En cas da nunobservaziun, èn previs chastis sensibels.
Tge è protecziun da datas?
Gia oz datti disposiziuns davart la protecziun da datas che valan era per federaziuns ed uniuns. La protecziun da datas ha en emprima lingia il scopo da proteger la persunalitad ed ils dretgs fundamentals da persunas. Ella regla tge che sto vegnir resguardà, sche datas da persunas vegnan elavuradas.
Tge è datas da persunas?
Sco datas da persunas valan tut las indicaziuns che san vegnir attribuidas ad ina persuna, sco indicaziuns da contact, lieus da dimora ma er registraziuns da video e maletgs.
Tge è protegia?
La protecziun da datas protegia las persunas dal procurar, arcunar, elavurar ed utilisar datas da maniera nungiustifitgada. Quai vul dir ch’ins dastga elavurar mo datas ch’èn adattadas e necessarias per l’intent da l’elavuraziun. Da muntada centrala è l’infurmaziun transparenta, tge datas che vegnan rimnadas per tge intent, sco er il consentiment da las persunas pertutgadas, en spezial sche las datas vegnan dadas vinavant.
Cur las datas dastgan vegnir?
Las datas dastgan vegnir dadas vinavant, sch’ il consentiment da la persuna sezza è avant maun, sche las datas èn accessiblas publicamain u sch’ina lescha lubescha da las dar vinavant.
La segirezza da las datas
Ultra da quai è la segirezza da las datas in princip da la protecziun da datas. Las datas ston vegnir administradas da maniera conscienziusa e segira.
Datas che sa refereschan a persunas ston ultra da quai vegnir destruidas u anonimisadas, uschespert ch’ellas n’èn betg pli necessarias per l’elavuraziun. Quai vala era per collavuratur(a)s ed anteriur(a)s collavuratur(a)s. Tut las persunas han il dretg da dumandar tar mintga federaziun u uniun, sche e tge datas da lur persuna che vegnan conservadas.
Datas che na pertutgan betg persunas, sco cifras da finanzas u datas da products na suttastattan betg a la protecziun da datas. Datas anonimisadas da commembers che vegnan evaluadas per intents statistics na suttastattan er betg a la protecziun da datas.
Tge mida cun la nova lescha da protecziun da datas?
Pauc! Vi dal cuntegn central da la protecziun da datas na sa mida betg bler. Ils princips restan ils medems. Ma la transparenza survegn dapli paisa. Perquai ston disposiziuns davart la protecziun da datas vegnir inditgadas sin la pagina d’internet ed i sto vegnir explitgà tge che vegn fatg cun las datas. Nova è l’obligaziun d’annunziar cas da maldiever da datas a l’incumbensà federal per la protecziun da datas. Er il transfer da datas a furnitur(a)s ed a partenari(a)s sto da nov vegnir reglà en in contract.
La decleranza davart la protecziun da datas sin la pagina d’internet
La decleranza davart la protecziun da datas sin la pagina d’internet survegn dapli muntada cun la nouva lescha. Quella è da nov obliganta per tuts. Ella sto infurmar tge datas che vegnan rimnadas ed arcunadas, tge programs eventuals che vegnan utilisads ed a tgi ch’ins sa sto adressar, sch’ins giavischa infurmaziuns. Nov è plinavant ch’ils parameters da basa da formulars, dad apps e da las paginas d’internet ston vegnir installads dapertut sin il nivel minimal, uschia che mo las datas necessarias vegnan rimnadas resp. ston vegnir communitgadas.
L’obligaziun da dar scleriment
L’obligaziun da dar scleriment è era vegnida pli rigurusa. Sch’ ina persuna pretenda infurmaziuns davart la dumonda, sche e tge datas dad ella ch’èn vegnidas elavuradas, sto questa infurmaziun vegnir fatga tenor las prescripziuns legalas, sch’i na dat naginas excepziuns.
Consultar detagliadamain questas prescripziuns.
Dumonda d’infurmaziun
Sin la medema pagina datti er in muster per ina dumonda d’infurmaziun. En quest connex sto er vegnir infurmà, sut tge cundiziuns che datas èn vegnidas dadas vinavant a terzas persunas.
Ils princips ils pli impurtants tar la protecziun da datas
Proporziunalitad
Il pli impurtant è il princip da la proporziunalitad. Datas ch’ins dovra per exequir in’incumbensa pon ins registrar.
Opportunitad
Al medem temp vala il princip da l’opportunitad. Las datas dastgan vegnir duvradas mo per quel intent per il qual ch’ins las ha survegnidas. Sch’ins communitgescha sias datas per exempel ad ina garascha d’autos, èsi cler ch’ins communitgescha a la garascha il num, il prenum, l’adressa, il numer da l’auto, tip da vehichel ed il dumber da kilometers. La dumonda è sch’il garaschist dastga dar vinavant quellas datas a sia federaziun per che quella possia far in mailing. Quella dumonda sto bain vegnir snegada. Il garaschist sto dumandar al client sch’el dastga far quai.
Transparenza
Essenziala è era la transparenza. Mintga client astga dumandar tar in’interpresa, tge datas dad el che vegnan elavuradas. Tenor lescha posseda el in dretg d’infurmaziun davart sias datas.
En buna fai
La lescha pretenda ultra da quai che las datas vegnian tractadas en buna fai. Quai vul dir ch’ellas vegnan registradas ed elavuradas be là e mo quellas datas ch’èn necessarias per l’activitad concreta. Tar in’uniun da musica èn quai numnadamain las datas da contact d’ina commembra u d’in commember (num, prenum, adressa postala, adressa da mail, numer da telefon), l’instrument, la durada da la commembranza u la scharscha che la persuna ha gì.
Tge sto vegnir examinà u midà per esser confurm a la LPD?
Datas generals da commembers e commembras
- Scolar la suprastanta e commembers/-bras >> vesair recumandaziun nr. 1
- Elavurar la decleraziun davart la protecziun da datas >> vesair recumandaziun nr. 2
- Elavurar da maniera facultativa in register d’elavuraziun >> vesair recumandaziun nr. 3
- Elavurar la decleraziun davart la protecziun da datas >> vesair recumandaziun nr. 4
Pagina web
- Elavurar la decleraziun davart la protecziun da datas >> vesair recumandaziun nr. 2
- Examinar tge tools che vegnan utilisads >> vesair recumandaziun nr. 5
- Orientaziun da la purschida a l’intern da la Svizra >> vesair recumandaziun nr. 6
- Examinar il transfer da datas a l’exteriur >> vesair recumandaziun nr. 7
Medias socialas
- Render attent en la decleraziun davart la protecziun da datas >> vesair recumandaziun nr. 2
- Ev. procurar il consentiment per la publicaziun >> vesair «Tge è protecziun da datas?»
- Examinar il transfer da datas a l’exteriur >> vesair recumandaziun nr. 7
Hitobito
- Elavurar la decleraziun davart la protecziun da datas >> vesair recumandaziun nr. 2
- Elavurar la decleraziun davart la protecziun da datas >> vesair recumandaziun nr. 4
Fin cura ston ins esser confurm a la LPD?
La LPD vala senza in termin transitoric a partir dal 1. da settember 2023. L’incumbensa principala vegn ad esser dad elavurar e da publitgar ina decleraziun davart la protecziun da datas per ademplir l’obligaziun d’infurmaziun.
Recumandaziuns
1 Scolaziuns
- Suprastanzas e persunas che lavuran cun datas da commebers/-bras ston vegnir sensibilisads per la tematica da la protecziun da datas.
- Realisaziun: Participaziun a scolaziuns u infurmaziuns or dal internet.
2 Decleraziun davart la protecziun da datas
- Mintga uniun che elavura datas da persunas dovra ina decleraziun davart la protecziun da datas. Quella duai tractar l’elavuraziun da datas sur la pagina web sco era sur la lavur da l’uniun.
- Realisaziun: Utilisar la decleraziun davart la protecziun da datas, muster p.ex. sin datenschutzmuster.ch
3 Register d’elavuraziun
- In register dals process da l’elavuraziun da datas na sto l’uniun (cun damain che 250 collavuratur(a)s) betg elavurar da maniera obliganta. Igl è dentant bun da savair tge e co che datas vegnan eruidas, arcunadas e stizzadas, per che la suprastanza sa possia cumportar cofurm a la protecziun da datas.
- Realisaziun: elavurar in register simpel.
4 Stizzadas
- La suprastanza duess examinar tge datas da commembers che vegnan elavuradas e tge datas che n’èn betg pli necessarias u che n’han nagina obligaziun da vegnir conservadas, per exemepl perquai che commembers èn sortids da l’uniun. Quellas datas ston alura vegnir stizzadas.
- Realisaziun: Da registers d’elavuraziun resulta tge datas che vegnan eruidas. Quai è la basa per intoducir rutinas da stizzar datas.
5 Avertiders da cookies
- La nova lescha davart la protecziun da datas na cuntegna nagina obligaziun per avertiders da cookies. En il cas singul po quai dentant esser necessari, p.ex. tar transfers da datas a l’exteriur. Cun l’utilisaziun da tools d’analisa (p.ex. Google-Analytics) u da plugins da medias socialas èsi dad infurmar, e tar transfers a l’exteriur en ils Stadis Unids, da procurar per in consentiment.
- Realisaziun: Examinar tge tools d’analisa che vegnan utilisads ed infurmar quai en la decleraziun davat la protecziun da datas. Avertiders da cookies n’èn per il solit betg necessaris.
6 Evitar la OLPD
- L’orientaziun da l’uniun (p.ex. tras la preschentaziun sin la pagina web) duai esser vesaivlamain mo a l’intern da la Svizra. Quai permetta dad evitar dad esser suttamess a la OLPD pli severa , era sche singuls commembers èn burgais da la UE.
- Realisaziun: Communitgar sin la pagina web che l’uniun s’orientescha cun sia purschida a l’intern da la Svizra.
7 Transfer da datas a l’exteriur
- Il transfer da datas en ils Stadis Unids (p.ex. l’utilisaziun da MSA365) u sur la pagina web vala actualmain sco malsegira, fin ch’il Cussegl federal ha tratg ina decisiun pertutgant la commensurabladad da transfers da datas en ils Stadis Unids.
- Realisaziun: Tar MS365 san ins inditgar in lieu dal server en Svizra u en la UE. Tar transfers da datas en ils Stadis Unids èsi da sperar ch’il Cussegl federal tira la decisiun necessaria pertutgant la commensurabladad il settember u october. A partir d’alura è il transfer da datas permiss senza consentiment
Protecziun da datas en l’USM
L’Uniun svizra da musica (USM) registrescha ed elavura mo datas che stattan en connex cun l’intent da l’uniun. Ella na registrescha e n’elavura en spezial naginas datas da persunas spezialmain sensiblas sco la confessiun, l’orientaziun politica u chaussas sumegliantas. Per registrar ed elavurar talas datas fissan las pretensiuns pli autas.
La USM na emetta er naginas datas da persunas senza consentiment arcunadas tar el u en ils sistems che vegnan duvrads dad el (p.ex. Hitobito) a terzas persunas, p.ex. per far reclama.
Nus prendain mesiras tecnicas ed organisatoricas adattadas per garantir ina segirezza da las datas adequata al ristg correspundent. L’access a nossa pagina d’internet succeda cun agid d’ina codaziun da transport (en spezial cun il Hypertext Transfer Protocol Secure, scursanì HTTPS). La gronda part dals browsers segnan ina codaziun da transport cun ina serra da segirezza en la trav d’adressas.
Fegl da FAQ e davart projects musters
Las respostas a diversas dumondas davart la protecziun da datas èn registradas en in fegl da FAQ. El vegn mess a disposiziun online sin la pagina digitala dad Unisono e sin la pagina d’internet. Medemamain datti la pussaivladad da retrair infurmaziuns supplementaras sco er links tar musters, davart projects e davart ina decleraziun davart la protecziun da datas standardisada sut l’adressa d’internet dals advocats Wicki Partners AG: datenschutzmuster.ch
Lescha da protecziun da datas en las uniuns e societads
La nova lescha davart la protecziun da datas na cuntegna naginas disposiziuns specificas per uniuns. Ella na pretenda era betg d’ infurmar da maniera proactiva commembers/-bras da l’uniun per il 1. da settember 2023. Però: Mintga uniun registrescha, elavura e/u dispona datas da persunas, che l’ uniun sto tractar tenor lescha.
La suprastanza da l’uniun surpiglia la responsabladad per il tractament da questas datas confurm a la protecziun da las datas e cun resguard da la LPD. L’uniun dastga registrar ed elavurar sulettamain datas da persunas che han in connex direct cun l’intent da l’uniun. Sche l’uniun vul registrar ulteriuras datas u las utilisar per auters intents che quels da l’uniun, sto ella infurmar ordavant en chaussa ed er communitgar che l’indicaziun dad ulteriuras datas possia vegnir refusada.
Decleraziun davart la protecziun da datas
Per ademplir l’obligaziun d’infurmaziun vegn normalmain duvrada ina decleraziun davart la protecziun da datas (DPD). Quella na dovra nagin consentiment, ins sto però avair la pussaivladad da prender enconuschientscha. Il pli simpel va quai cun plazzar la DPD sin la pagina d’internet d’ina uniun, savens succeda quai en ina annotaziun al pe-pagina da la pagina web (Footer).
Las indicaziuns obligatoricas d’ina DPD
Las indicaziuns obligatoricas d’ina DPD resultan da l’art. 19 LPD. La dimensiun dependa p.ex. da las datas da persunas elavuradas, dal transfer a l’exteriur e da l’integraziun en medias socialas. Il sboz d’ina simpla DPD è da chattar sin datenschutzmuster.ch.
Tar las indicaziuns d’ina decleraziun davart la protecziun da datas tutgan:
- Identitad e datas da contact da l’uniun e da la suprastanza
- Enumeraziun da las datas che vegnan registradas ed elavuradas
- Descripziun dals intents per l’elavuraziun da las datas
- Nominaziun da retschaviders u da categorias da retschaviders che survegnan datas (p.ex. tracking, plugins da medias socialas ed autras tecnologias en connex cun l’utilisaziun da la pagina web u era p.ex. fiduziaris, furniturs ed autras terzas persunas en connex cun l’activitad d’uniun)
- Eventuals transfers da datas a l’exteriur
- Persuna da contact interna
- Midada da la DPD (adina pussaivla, era da maniera unilaterala)
La nova lescha davart la protecziun da datas na cuntegna nagina obligaziun per avertiders da cookies. En il cas singul po quai dentant esser necessari, p.ex. tar transfers da datas a l’exteriur. Cun l’utilisaziun da tools d’analisa (p.ex. Google-Analytics) u da plugins da medias socialas èsi dad infurmar, e tar transfers a l’exteriur en ils Stadis Unids, da procurar per in consentiment.
Dar vinavant datas da persunas
L’incumbensà federal per la protecziun da datas (EDÖB1) e per relaziuns publicas renda attent sin sia pagina d’ internet che la publicaziun da datas da persunas en in magazin u sin la pagina web saja mo lubida, sche quai saja cunvegnent. La suprastanza sto examinar quai ordavant. L’access a datas da commembers/-bras sto vegnir limità en in sectur protegì ad in circul da persunas definì.
La communicaziun da datas da commembers/-bras (p.ex. consegna da la glista da commembers/-bras cun adressas) ad auters commembers è da princip mo lubida, sch’ins ha dumandà ordavant il consentiment da mintga singul commember e sch’igl è definì cleramain, per tge intent che las datas communitgadas vegnan duvradas (p.ex. per contactar in l’auter; per activitads d’uniun, dentant betg per recrutar clientella). En cas da spediziun electronica a commembers/-bras sto vegnir duvrada la funcziun da la «copia tschorva» per impedir che las datas vegnian dadas vinavant a commembers/-bras senza lur consentiment.
La communicaziun da datas da commembers/-bras a terzas persunas è mo lubida, sch’ils commembers èn vegnids infurmads davart l’intent da la communicaziun ed han dà lur consentiment expressiv u han gì la pussaivladad da cuntradir avant la communicaziun. Da l’infurmaziun sto resortir tge datas (adressa, data da naschientscha, numer da telefon, etc.) che vegnan dadas vinavant, per tge intent (p.ex. reclama, surdada da licenza) ed a tge terzas persunas (sponsurs, uniun e.u.v.). Sche necessari po la communicaziun menziunada esser previsa en ils statuts u en ina prescripziun speziala. La communicaziun da datas a terzas persunas è era imaginabla, sche quai è previs u prescrit da la lescha (p.ex. la communicaziun da datas en ina procedura penala).
1 funtauna per quest alinea: https://www.edoeb.admin.ch/edoeb/de/home/datenschutz/freizeit_sport/datenbearbeitung_vereine.html
Facit
«L’adempliment e l’observaziun da la LDPrev n’è betg mo necessaria per observar las leschas vertentas, mabain er per betg far donn a l’atgna reputaziun e per elavurar las datas dals commembers en moda confurma a la lescha. La realisaziun e l’adattaziun a la nova situaziun giuridica pretenda eventualmain in ‹curt act da forza›, uschia che l’uniun resp. las societads commembras èn en ina buna situaziun», ha declerà l’advocat ed expert per la protecziun da datas Sven Kohlmeier en il discurs cun Unisono.
En vista a la smanatscha da multas pli autas, en cas da cuntravenziuns ch’èn da responsar da la persuna privata, recumandain nus da resguardar stringentamain las obligaziuns cardinalas da la nova LPDrev, oravant tut l’adempliment da las obligaziuns d’infurmaziun sco er l’observaziun da las pretensiuns en cas da transfer da datas a l’exteriur en stadis senza in nivel da protecziun da datas adequat; actualmain er anc ils Stadis Unids, guarda contribuziun: https://www.wickipartners.ch/news/eu-erlsst-angemessenheitsbeschluss-fr-us-datentransfer
Funtaunas:
https://www.kmu.admin.ch; https://www.windband.ch; RA und Fachanwalt für IT-Recht (DE) Sven Kohlmeier
(Wicki Partners AG, Zürich); RA Dr. Roman Baumann Lorant (ALTENBACH BAUMANN BLOCH, Dornach SO)
