Simon Gabriel è European Solo Champion

Ils champiunadis europeics da brass band (EBBC) han gì lieu la fin d’avrigl a Linz (A). Tar il final da la concurrenza europeica da solistas e solists è in Svizzer stà il davos il pli sisum sin il podest: il Grischun Simon Gabriel (18) ha intgantà tut las preschentas ed ils preschents, è daventà champiun europeic ed ha gudagnà al medem mument era il premi dal public e quel da la band.

Simon Gabriel, cordiala gratulaziun per tia victoria a las EBBC a Linz. Tge munta il titel «European Solo Champion» per tai?

Grazia fitg! Il titel è fitg impurtant per mai. Ils EBBC èn ina da las pli grondas ed impurtantas concurrenzas en la scena da brass band. E dastgar gudagnar là è natiralmain insatge extraordinari. Oravant tut pervi da la participaziun da bleras solistas e blers solists fitg ferms da l’entira Europa. Per mai è quai ina gronda conferma da mia lavur dals davos onns.

Ha quest success influenza per tes avegnir?

Jau pens ch’il titel avra segir insaquantas portas e motivescha anc dapli per ils proxims pass. Al medem mument emprov jau da restar calm e da ma sviluppar vinavant musicalmain. La victoria è in highlight, ma era ina stimulaziun da lavurar vinavant.

Foto: zVg

Per la davosa stagiun has ti midà tar la Liberty Brass Band en Svizra orientala. Co èsi vegnì a quella midada?

Il contact era qua gia dapi in temp, e suenter intgins discurs hai jau gì in bun sentiment. Liberty è musicalmain enorm attractiv e captivant e porscha bleras pussaivladads da sa sviluppar vinavant.

Restas ti tuttina fidel a la Brass Band Grischuna?

Gea, la Brass Band Grischuna resta vinavant ina part impurtanta per mai. La band ma stat fitg a cor, ed jau vuless en mintga cas mantegnair vinavant il contact e la collavuraziun.

Areguard tia professiun es ti ussa en la scolaziun sco spezialist da restorant AFQ. Cura va quella scolaziun a fin?

Mes emprendissadi en l’Hotel Waldhaus a Segl terminesch la stad 2027, e qua tras resultan natiralmain novas pussaivladads da daventar in pau pli flexibel areguard la musica ed era persunalmain.

Co vai vinavant cun tia carriera da solist? Tge èn tes proxims projects?

Actualmain vuless jau simplamain giudair la situaziun actuala e ma metter al medem temp novas finamiras. Planisads en differents concerts, concurrenzas e projects cun brass bands. Jau ma vuless sviluppar vinavant tant sco solist sco era musicalmain en general.

Foto: zVg

A chaschun da la davosa intervista avant dus onns has ti ditg che ti studegiassas gugent en Engalterra – è quai anc adina actual?

L’interess è en mintga cas anc adina preschent. L’Engalterra è natiralmain fitg captivanta per brass band e cornet. Actualmain m’infurmesch jau davart differentas pussaivladads en Svizra ed en ils pajais vischins, ed jau ma poss imaginar bain da ristgar insacura quel pass.

Studegiassas ti lura plitost trumbetta classica u cornet?

Quai n’è anc betg decis. Domadus secturs ma fascineschan fitg. D’ina vart m’interessa la scolaziun da trumbetta classica, da l’autra vart batta mes cor natiralmain ferm per il mund da la brass band e dal cornet.

Èsi pussaivel da studegiar trumbetta e da sunar al medem temp vinavant cornet en brass bands?

Absolutamain gea. Blers fan quai schizunt cun grond success. Ils fundaments èn fitg sumegliants e blers trumbettists classics sunan al medem temp cornet en brass bands sin in aut nivel. Quai sa cumplettescha savens schizunt fitg bain.

Grazia fitg, char Simon, che ti has prendì il temp da respunder a las dumondas da la redacziun unisono. Nus ta gratulain anc ina giada cordialmain e ta giavischain tut il bun e bler success per tes avegnir.

Dapli davart ulteriurs success svizzers als EBBC a Linz: