Simon Gabriel gudogna ils SOLO-Finals

Ils SOLO-Finals èn decis: Il titel dal champiun dals champiuns va al giuven trumbettist grischun Simon Gabriel. El ha gudagnà avant l’oboist Fridolin Hunziker e la flautista Mathilde Jaquier. Retrospectiva sin in suentermezdi cun musica dad auta classa.

La 20avla ediziun da la concurrenza da solist(a)s da l’Uniun svizra da musica (USM), ils SOLO-Finals dal SWISS WINDBAND AWARD – l’anteriur Prix Musique – ha gi lieu ils 14 da settember en il teater La Poste a Visp. Suenter il salid da Christian Bohnet, il president da l’Uniun da musica chantunala dal Vallais, ha l’orchester sinfonic d’instruments da flad da l’armada svizra, sut la direcziun da Stefan Roth avert l’occurrenza cun «Images of a City» da Franco Cesarini. Franz Ruppen, il president da la regenza dal Vallais ha accentuà en ses pled che la musica saja ina lingua che mintgin chapescha.

Foto: Nathalie Gobet-Vial

Ina fantasia, in concert ed in capriccio

La solista da 19 onns Mathilde Jaquier da Delémont è stada l’emprima sin tribuna. Cun sia flauta a travers ha ella suna la «Fantasia da Carmen» da l’opera da Bizet, da François Borne en in arranschament da John Glenesk Mortimer. Ella è sa sentida visiblamain bain cun quest’ovra ed è passada da maniera eleganta tras ils temas da l’opera renumnada dal romanticher franzos ed ha giugà cun las difficultads tecnicas da las variaziuns.

Foto: Nathalie Gobet-Vial

Simon Gabriel da S-chanf GR è sa decidì per il famus «Concert per trumbetta» dad Alexander Arutjunjan, arranschà da Guy Duker. Il virtuos da 16 onns ha dumagnà quest’ovra che fa part a la litteratura musicala mundiala cun ina ligerezza surprendenta da l’entschatta a la fin.

Foto: Nathalie Gobet-Vial

«Capriccio» da Amilcare Ponchielli, en in’elavuraziun dad Albert Benz è stada l’ovra che Fridolin Hunziker, 17 onns, da Buchrain LU ha elegì per sia oboa. Fluiditad da las lingias e senn per la frasaziun han caracterisà sia interpretaziun da l’ovra spezialmain melodiusa cun elements che sumeglian ad in’opera.

Foto: Nathalie Gobet-Vial

Bainbaud in nov format

Suenter la pausa ha la presidenta da la USM, Luana Menoud-Baldi drizzà in pèr pleds d’engraziament a tut las persunas ed organisaziuns participadas a la realisaziun da l’occurrenza. Michel Graf, vicepresident da la USM e responsabel per ils SOLO-Finals ha fatg ina fin a la tensiun ed ha communitgà la decisiun da la giuria che cumpigliava Claude-Alain Barmaz, Tristan Uth e Silvia Riebli. Mathilde Jaquier è daventada terza, Fridolin Hunziker ha cuntanschì la segunda plazza e Simon Gabriel ha gudagnà il titel.

Ultra dal pocal e dals premis en daners – 1500, 1000 e 500 francs – surdads da la USM, ha mintga solist(a) survegnì in bon da 1000 francs, offert da Musik Zurkinden e surdà persunalmain da Beat Zurkinden.

L’Orchester sinfonic dad instruments da flad da l’armada svizra ha terminà quest suentermezdi cun musica d’emprima classa tranter auter cun «Music of the Spheres» da Philip Sparke. Sco supplement e renconuschientscha per il Vallais ha el anc sunà «Marignan» da Jean Daetwyler.

Ils SOLO-Finals dal SWISS WINBAND AWARD han uschia gì lur davosa ediziun en la furma enconuschenta dapi insaquants onns. A partir dal 2025 vegn la concurrenza structurada en duas parts – instruments da flad e percussiun. Il mez final ha lieu il favrer ed il final la fin d’avust.