Al final da la 11avla Conducting Competition ils 13 da settember 2026 a Baden surdat la giuria ex aequo in segund premi a Luca Belz da Zollikofen BE ed a Romain Gili da Kriens LU. Julia Wyser da Weinfelden TG survegn in terz premi.
Il final da la Conducting Competition ha gì lieu en il rom dal SWISS WINDBAND AWARD la dumengia saira, ils 13 da settember 2026 en il Kurtheater Baden. La finalista ed ils dus finalists han dirigì l’Orchester sinfonic d’instruments a flad da l’armada svizra, ina furmaziun d’auta classa da musicistas e musicists d’elita da la Svizra che fan lur servetsch en la musica militara.
Foto: Rudolf HugTalents da diriger en concurrenza
La sort ha determinà la successiun e las ovras: Julia Wyser ha avert il final cun «Quadrant des rêves, Poème chorégraphique» da Franco Cesarini. Luca Belz è suandà cun la «Visiun» da Paul Huber en ina ediziun da Carlo Balmelli. La finiziun ha fatg Romain Gili cun «Gli Elementi» da Jean Balissats. Per mintga ovra han ils participants dal final gì a disposiziun ordavant 45 minutas temp d’emprova cun l’Orchester sinfonic d’instruments a flad da l’armada svizra.
Foto: Rudolf HugLas pretensiuns da la concurrenza èn fitg autas, perquai n’ha la giuria che consista dad Annick Villanueva (F), Chiara Vidoni (I) e Stefan Roth (CH) surdà nagin emprim premi. Cuntanscher ina distincziun en questa concurrenza munta en mintga cas in grond success – era sch’igl è in segund u in terz premi. La presidenta da la giuria, Annick Villanueva è lura era stada cuntenta cun la 11avla Conducting Competition: «I dat be singulas concurrenzas da quest gener. Per mai èsi il pli impurtant da promover dirigentas e dirigents giuvens. Per ellas ed els è questa pussaivladad fitg preziusa da diriger orchesters da fitg auta qualitad e da preschentar ovras pretensiusas.»
Foto: Rudolf HugLavur d’emprova, tecnica da diriger ed interpretaziun
Per la concurrenza en trais parts èn las nov participantas e participants stads confruntads cun differentas sfidas. En la prerunda han els exercità cun il WindOrchestra Baden Wettingen durant ventg minutas ina cumposiziun nunenconuschenta a l’orchester. La giuria ha valità qua surtut la metodica da provas.
Foto: Rudolf HugSis talents da diriger èn sa qualifitgads per il mezfinal. Là han els gì a disposiziun tschintg minutas per exercitar cun la furmaziun d’elita, la Brass Band Emmental, in’ovra enconuschenta a la Brass Band, e ch’è silsuenter vegnida preschentada directamain. En il focus è stà la tecnica da diriger. Julia Wyser, Luca Belz e Romain Gili èn sa qualifitgads per il final.
La sort ha determinà en tut las parts da la concurrenza la successiun e las ovras. Perquai han ils participants stuì preparar ordavant tut las otg cumposiziuns. Tut las parts da la concurrenza èn stadas publicas; oravant tut la prerunda ed il final han gì grond interess dal public.
Premiera da la cumposiziun da Théo Rossier
Avant la surdada dal premi ha l’Orchester sinfonic d’instruments a flad da l’armada svizra preschentà tranter auter ina primaudiziun a chaschun dal concert da gala. Sut la direcziun da Gaudens Bieri ha l’orchester sunà per l’emprima giada davant public «Ab Uno» dal cumponist dal chantun Vad Théo Rossier (*2002).
Rossier ha gudagnà cun sia cumposiziun la concurrenza da cumposiziun scritta ora da la cumissiun da musica da l’Uniun svizra da musica. El ha gudagnà cunter diesch participants. L’incumbensa è stada d’onurar cun ina nova cumposiziun l’impurtant cumponist svizzer Paul Huber, a chaschun dal 25avel di da sia mort il 2026.
